Ыыраах Ньукулай

  Ыыраах Ньукулай-Николай Николаевич Болторин-Таатта олоҥхоһута 
Ыыраах Ньукулай-Николай Николаевич Болторин 1-й Дьохсоҕоҥҥо Кыайыгын аҕатын ууһугар «Мутук Ойдубут» диэн сиргэ төрөөбүтэ. Онно олорои бастакы кэргэнин Лэппэй Киргиэлэй (Саввин) кыыһын Александраны кэргэн ылан, хас да сыл олорбуттара. Кини бастакы кэргэнэ өлбүтүн кэннэ Чымынаайыга көһөн киирэн, иккиһин Өкүлүүнэ диэн дьахтары кэргэн ылбыта.
 Ыыраах Ньукулай олоҥхонон, ырыанан бэрт эдэр сааһыттан ылата дьарыгырбыта уонна бэйэтин уһуна суох үйэтин устатыгар ыҥырыыттан ыҥырыыга сылдьан, наар бурдук манньаҕа ыллыыра, Кини аан бастаан саас Амма Солобуудатыгар ыалларга ыллаан бурдуктаһа тиийбитигэр: «Туох сонуннаах, хантан сылдьар киһигиннй?» диэн ыйыппыттарыгар: «Ээ, оччо-бачча сонуна суох киһибин, арай ити сылдьаҕар муостаах саадьаҕай оҕуспар отут олонхону, сэттэ уон сэрэбиэйи тиэн» сылдьар киһибин», - диэн хоруйдаабыт. Кэлин ыаллар кини олоҥхотун, ырыатын истэн бараннар эккирэтэ сылдьан ыҥырар, ыалтан ыалга былдьаһан олоҥхолотор киһилэрэ буолта үһү. Дьахтары кытары дьахтар, оҕону кытары оҕо курдук оонньуур, наһаа сытыары сымнаҕас уонна элэккэй майгылаах, кыра уҥуохтаах, ис киирбэх куобаҕай дьүһүннээх киһи этэ, дьээбэлэннэҕинэ дьахталлары уун-утары көрөн олорон, туойан ыллаатаҕына киһи сөҕүөн, бэркиһиэн курдук бэргэнник, табатык уустаан-ураннаан, дьүһүннээн-бодолоон ыллыыра диэн кинини чугастык билэр дьон кэпсииллэрэ. Ыыраах Ньукулай тэлэгирээмэ сутун уһун сыллаах уот кураан дьылларыгар Амма Солобуудатыгар хаста да кырынан баран ыллаан, бүтүн биир болуоту толору бурдук манньалатан аҕалан, Чымынаайы ыалын кэмэ суох абыраабыта диэн билиҥҥэ диэри уос номоҕо оҥостоллор.

	Андросов Е.Д
	— [[]]